ကမ္ဘာ့ နှစ်ခြင်းခရစ်ယာန် ဘာသာရေးအဖွဲ့ (Baptist World Alliance – BWA) အဖွဲ့က ထိုင်း-မြန်မာ နယ်စပ်တွင် ဒုက္ခသည်များကို နှစ်ပေါင်း ၃၀ နီးပါး ဆေးဝါးကုသစောင့် ရှောက်မှု ပေးနေသည့် ဒေါက်တာစင်သီယာမောင်အား၂၀၁၇ ခုနှစ် အတွက် Denton and Janice Lotz လူ့အခွင့်အရေးဆု ချီးမြှင့်လိုက်သည်။

အဆိုပါ ဆုမှာ ကုလသမဂ္ဂ အပြည်ပြည်ဆိုင်ရာ လူ့အခွင့်အရေး ကြေညာစာတမ်းအရ လူ့အခွင့်အရေး ကာကွယ်စောင့်ရှောက်မှု အတွက် ထူးထူးခြားခြား စွမ်းဆောင်နိုုင်သူများ အား ပေးအပ်သည့် ဆု ဖြစ်ပြီး၊၂၀၀၆ ခုနှစ်မှ စကာ နှစ်စဉ် ပေးအပ်သည့် ဆုဖြစ်သည်။

ယင်းဆုကိုလာမည့် ဇူလိုင် ၂ ရက်မှ ၇ ရက်နေ့ အထိ ထိုင်းနိုင်ငံ ဘန်ကောက်မြို့တွင် ကျင်းပမည့် BWA နှစ်ပတ်လည် တွေ့ဆုံပွဲ အခမ်းအနား တွင် ပေးအပ်သွား မည် ဖြစ်ကြောင်း သိရသည်။

ဒေါက်တာစင်သီယာမောင်သည် ၁၉၈၈ အရေးတော်ပုံ ဖြစ်ပွားပြီးနောက် ထိုင်း-မြန်မာ နယ်စပ်ကို ရောက်ရှိခဲ့ပြီး “ကျောင်းသားဆေးခန်း” ဟု လူသိများသည့် မယ်တော်ဆေးခန်းကို တည်ထောင်ကာ စစ်ပြေး ဒုက္ခသည်များ၊ ရွှေ့ပြောင်း အလုပ်သမားများနှင့် ငွေကြေး မတတ်နိုင်သူများကို အခမဲ့ ဆေးကုပေးလျှက် ရှိသည်။

ယင်းဆေးခန်းတွင် အတွင်းလူနာ၊ အပြင်လူနာ တရက်လျှင် လူနာ ၃၀၀ ဝန်းကျင် ကုသပေးနေရပြီး မဲဆောက်မြို့ရှိ ရွှေ့ပြောင်း အလုပ်သမားများ၏ ကလေးငယ်များ အတွက်လည်း ကျောင်းဖွင့်လှစ်ကာ အခမဲ့ပညာ သင်ကြားပေးထားသည်။

ဒေါက်တာ စင်သီယာမောင်သည် နိုင်ငံတကာက ချီးမြှင့်သည့် ဆုပေါင်း ၂၀ ကျော် ရရှိထားပြီး ၁၉၉၉ ခု နှစ်တွင် ဂျိုနသန်မန်းဆု၊ ၂၀၀၂ ခုနှစ်တွင် ရေမွန်မက်ဆေးဆေးဆု၊ ၂၀၁၃ ခုနှစ်တွင် ဆစ်ဒနီ ငြိမ်းချမ်းရေးဆု၊ ၂၀၁၅ ခုနှစ်တွင် the South Korean POSCO TJ Park Prize ၊ ၂၀၀၃ ခုနှစ်တွင် တိုင်းမ်မဂ္ဂဇင်း၏ အာရှသူရဲကောင်းများထဲမှ တဦးအဖြစ် ဖော်ပြခြင်းခံခဲ့ရသည်။